Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Një muaj në fokus, shkurt 2008

• Me datën 1 shkurt 2008

Myftiu i Shkodrës, Imam Ndriçim Sulejmani, xhumanë e radhës e mbajti në fshatin Drisht të Komunës Postribë. Ai u prit nga imami i xhamisë, z. Xhavit Sokoli. Në hytben e xhumasë, gjatë bisedës myftiu foli për rëndësinë që kanë pesë shtyllat e Islamit në jetën e një besimtari mysliman, për vlerësimin e të qënit të tyre pjesëtarë krenarë të fesë islame dhe për nevojën e mbështetjes së parimeve të kësaj feje. Më tej ai u ndal te pika më e ndjeshme për komunitetin mysliman, pikërisht për pronat, të cilat uzurpohen padrejtësisht nga njerëz të papërgjegjshëm. Ai theksoi se “as falja, as lutja dhe asnjë adhurim tjetër brenda islamit nuk mund t’u pranohet atyre njerëzve që padrejtësisht dhunojnë tokën e Zotit”. Xhamia e Drishtit ka një moshë rreth 400-vjeçare. Nga Myftinia do të merren masat që ky objekt kulti i vjetër të propozohet pranë Ministrisë së Kulturës për t’u përfshirë në listën e  monumenteve të kulturës.

• Po me datën 1 shkurt 2008

U  zhvillua mbledhja e zakonshme e këshillit të myftinisë. Në rendin e ditës u trajtuan dy pika. Analiza vjetore e punës së myftinisë Shkodër për vitin 2007 dhe plani vjetor i 2008. Myftiu, Imam Ndriçim Sulejmani lexoi të plotë raportin me të gjitha rubrikat mbi arritjet e Myftinisë për vitin 2007. Më pas, lexoi planin e Myftinisë për vitin 2008. Administratori, Blendi Alushi, më tej lexoi para këshillit projekt buxhetin e vitit 2008 me të gjitha zërat e parashikuara, projekt ky që u miratua nga këshilli i Myftinisë.

• Me datën 6 shkurt 2008

Në zyrën e Myftinisë, në një vizitë kortezhe, myftiu i Shkodrës, Imam Ndriçim Sulejmani priti koordinatoren e përgjithshme të fondacionit “Islamic Relief”. Ajo shoqërohej nga drejtori i përgjithshëm për Shqipërinë i këtij fondacioni, z. Muhammed EL Waei. Në këtë takim Myftiu vlerësoi kontributin e çmuar që po jep fondacioni “Islamic Relief” në qarkun e Shkodrës dhe bashkëpunimin e frytshëm mes dy palëve.

• Po me këtë datë (6 shkurt 2008)

Në zyrën e myftinisë Shkodër mbërriti për një vizitë pune nga Arabia Saudite koordinatori i shoqatës “Wamy” z. Abdullah El Muhejdib. Ai shoqërohej nga drejtori i kësaj organizate për Shqipërinë, z. Hektor Saliaj. Në takim u bisedua për projektet të cilat do të zbatohen në xhaminë e madhe “Ebu Bekër” të qytetit tonë, të cilat kryesisht konsistojnë në restaurimin dhe meremetimin e pjesëve të amortizuara të kësaj xhamie. Ky restaurim mundësohet nga familja El Zamil.

• Me datën 11 Shkurt 2008

Me ftesë nga ambasada Iraniane akredituar në vendin tonë në Tiranë, myftiu Imam Ndriçim Sulejmani mori pjesë në ditën kombëtare të Revulucionit të Iranit. Në këtë takim Myftiu i transmetoi ambasadorit iranian  urimet më të mira për këtë datë të shënuar për popullin e Iranit. Ai theksoi se: “Festat kombëtare janë simbole të shenjta të një populli dhe si të tilla meritojnë vlerësime dhe konsiderata të veçanta, pasi ato janë atributet me të cilat popujt prezantohen para njëri tjetrit”. 

• Me datën 15 shkurt 2008

Nëpërmjet minberit të xhamisë “Ebu Beker”, myftiu Imam Ndriçim Sulejmani, u përcolli besimtarëve myslimanë të qytetit në ligjëratën e xhumasë, një mesazh me rastin e pavarësisë së Kosovës, në të cilën ai u lut për mbarësinë  e saj dhe kërkoi nga besimtarët të bashkohen në lutje për këtë çast historik jo vetëm për Kosovën por edhe për Shqipërinë.

• Me datën 16 shkurt 2008

Në zyrën e Myftinisë mbërriti për një vizitë kortezie drejtori i ri i Fondacionit Iranian të Kur’anit. Në këtë vizitë ai shoqërohej nga stafi i tij.  Myftiu pasi i uroi mirëseardhjen, i bëri një ekspoze të punës së Myftinisë, duke e prezantuar mikun nga Irani me strukturën e Myftinisë, objektivat e saj dhe mënyrat e bashkëpunimit. Nga ana e tij drejtori i fondacionit, pasi e falënderoi myftiun për mikpritjen,, i premtoi bashkëpunim në fusha të ndryshme me fondacionin që përfaqëson, duke theksuar më së shumti nevojën e sesioneve shkencore të përbashkëta. Në fund, për nder të vizitës së tij në qytetin e Shkodrës Myftinia shtroi një drekë.

• Po me datën 16 shkurt 2008

Me rastin e Pavarësisë së Kosovës, myftinia Shkodër filloi solidarizimin e saj  për të ndarë së bashku me vëllezërit nga Kosova gëzimin e kësaj dite të veçantë. Me këtë rast në dy xhamitë kryesore të qytetit, Parrucë dhe “Ebu Bekër” u vendosën flamuj dhe postera urimi “Mbarësi pavarësisë së Kosovës”.

• Ndërsa me datën 17 shkurt 2008

Ditën e shpalljes së Pavarësisë, myftinia e Shkodrës u dërgoi Qeverisë së re dhe Bashkësisë Islame të Kosovës  telegrame urimi. Po në këtë ditë, myftiu i Shkodrës përcolli para mediave kombëtare TVSH, “News 24” dhe atyre lokale (TV1 Channel e “Rozafa”) një mesazh në të cilin shprehu kënaqësinë e veçantë për pavarësinë e  Kosovës dhe falënderoi për kontributin e çmuar Shtetet e Bashkuara të Amerikës, organizmat ndërkombëtarë dhe shtetet evropiane.