Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Një muaj në fokus- shkurt, 2007

·        Me datën 10. 02. 2007, u zhvillua mbledhja e Këshillit të Imamëve të myftinisë, Shkodër. Në këtë takim u diskutua për projektet e reja të myftinisë, Shkodër, në lidhje me mbarëvajtjen e punës shërbestare islame në xhamitë e rrethit. U dhanë disa detyra dhe udhëzime me rëndësi për imamët dhe xhematet e tyre.

·        Me datën 12. 02. 2007, myftiu i Shkodrës, Imam Ndriçim Sulejmani, mori pjesë në ceremoninë e zhvilluar nga ambasada iraniane në vendin tonë, në hotel “Rogner”, Tiranë, me rastin e përvjetorit të 27- të të Revolucionit Islam në Iran, të udhëhequr nga Imam Khomejni.

   Gajtë takimit me ambasadorin iranian, myftiu, Imam Ndriçim Sulejmani, i shprehu atij dhe popullit vëlla të Republikës Islame të Iranit, urimet më të ngrohta për festën, duke theksuar se ditë të tilla të shënuara, shërbejnë për të ringjallur frymën e unitetit, sensibilizimit dhe forcimit të urave që lidhin cepat e ymetit islam nëpër botë.

   Ai vlerësoi gjithashtu, përpjekjet serioze dhe angazhimet e vlefshme të dijetarëve muslimanë, synitë e shiitë, për të unifikuar forcat e tyre në përballje me sfidat e reja të globalizmit.

   Nga ana e tij, ambasadori iranian falënderoi myftiun për pjesëmarrjen e tij në këtë festë dhe ndër të tjera përmendi se: “Shkodra është qytet i traditave dhe i kulturës. Ajo, në syrin tonë, i përngjet qytetit të famshëm të Asfahanit”.

   Ambasadori iranian, e priti me kënaqësi ftesën e myftiut Sulejmani për një vizitë në qytetin e Shkodrës.

·        Me datën 14. 02. 2007, Imam Ndriçim Sulejmani, myfti i Shkodrës, i shoqëruar me disa pjesëtarë të institucionit të tij, i bëri një vizitë kortezie prefektit të ri të Shkodrës, z. Maxhid Cungu.

   Gjatë takimit të ngrohtë e të përzemërt, myftiu e uroi prefektin për detyrën e re, duke i dëshiruar atij mbarësi e sukses, për të mirën e qetësisë dhe mirëqenies së qytetarëve të Qarkut, Shkodër.    

   Nga ana e tij, prefekti, z. Maxhid Cungu, falënderoi myftiun Sulejmani për vizitën e ngrohtë dhe vlerësoi angazhimet e tij serioze për harmoninë dhe bashkëjetesën ndërfetare në qytetin tonë.

·        Me datat 17. 02. 2007 dhe 24. 02. 2007, myftiu, Imam Ndriçim Sulejmani, zhvilloi takime intensive pune me një grup specialistësh, ekonomistë dhe juristë, rreth problemeve të pasurive vakëf të myftinisë, Shkodër dhe gjetjen e rrugëve të mundshme të shfrytëzimit të tyre.

·        Me datën 18. 02. 2007, myftiu, Imam Ndriçim Sulejmani, mori pjesë në votimet vendore, për zgjedhjen e drejtuesve të ri lokalë. Gjatë mesazhit të tij mediatik, ai uroi mbarëvajtjen e këtyre votimeve dhe suksesin e kandidatëve.

·        Gjatë muajit shkurt 2007, pёrkatёsisht nё datat 8, 14  myftiu, Imam Ndriçim Sulejmani, vazhdoi turin e vizitave në xhamitë e Shkodrës, ku u ndal në xhamitë e fshatrave Gur i Zi, Kuç, Kosmaç, Ganjollë dhe Mjedë. Gjatë vizitave të tij, myftiu shoqërohej nga një grup pune i myftinisë, Shkodër. Në këto takime, u kërkua angazhimi maksimal i imamëve dhe i shërbyesve të ndryshëm në këto xhami për të ruajtur të pacënuar shpirtin e fesë islame, kultivimin e mëtejshëm të traditave të mirëfillta islame dhe arsimimin e fëmijëve. Ndër të tjera, në këto takime myftiu theksoi, se: “Islami është feja jonë, që e kemi përqafuar me dëshirë dhe arsyetim të plotë. Nuk duhet të tundohemi nga propagandat femohuese, që po shtohen dita-ditës në vendin tonë. Kjo duhet të na nxisë që të bëjmë më të mirën, për t’i shërbyer fesë së All-llahut, i Cili urdhëron për mirësi, dituri, harmoni e drejtësi. Të mos humbasim asnjë çast në rrugën e përçuarjes së mesazheve të dritës, me të cilat erdhi i fundit i të dërguarve, Muhammedi (a.s) ”.

·        Me datën 23. 02. 2007, pas përfundimit të hytbes së xhumasë në xhaminë “Ebu Bekr”, myftiu i Shkodrës, ka bërë publik vendimin e Kryesisë së Komunitetit Musliman Shqiptar, për emërimin e teologut Ylli Buraniqi, në detyrën e imamit të ri të kësaj xhamie. Imami i ri i xhamisë “Ebu Bekr”, është diplomuar në teologjinë islame, nga Universiteti Teologjik, në Rijad të Arabisë Saudite.