Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Një muaj në fokus- qershor, 2007

Ø   Me datën 1 qershor 2007, myftiu i Shkodrës Imam Ndriçim Sulejmani, mori pjesë në ceremoninë e organizuar nga konsullata italiane në Shkodër me rastin e festës së Republikës së Italisë.

Ø   Nga data 6-7 qershor 2007, në ambientet e Bar-Restorant “Agim Hysa”, Myftinia Shkodër në bashkëpunim me Fondacionin “Islamic Relief”, organizoi trajnimin me temë: “Menaxhimi i projekteve”, ku morën pjesë nëpunës dhe funksionarë të këtij institucioni.

Ø   Me datën 9 qershor 2007, në Xhaminë e Plumbit u zhvillua ceremonia madhështore e mbylljes së aktiviteteve kushtuar Lindjes së Begatë të Hazreti Muhammedit (a.s). Në këtë ceremoni mori pjesë edhe Imam Ndriçim Sulejmani, shoqëruar nga thirrës islamë dhe teologë aktivë në veprimtaritë e shumta të myftinisë Shkodër. Në fjalimin e tij ai bëri një përshkrim të studiuar të personalitetit të Profetit Muhammed (a.s) dhe nxiti të pranishmit që ta mbjellin dashurinë e tij në familjet e tyre, në shtëpi, në lagje, kudo në shoqëri, sepse misioni i tij ishte dërgesa mëshirë për të gjitha botrat.

Ø   Me datën 9 qershor 2007, në Xhaminë e Plumbit, në përfundim të ceremonisë së Mevludit Sherifë, myftinia Shkodër nderoi me “Çertifikatë Mirënjohje” pjesëtarët e grupit të Mevludit, H. Faik Zaganjori, H. Sami Muçej dhe Hafiz Shukri Kapllan për kontributin e tyre të vyer në shërbim të konsolidimit dhe forcimit të dashurisë për Profetin Muhammed (a.s), nëpërmjet këndimit të ilahive dhe pjesëve të mevludeve. Në këtë ceremoni u nderuan edhe Hafiz Musa Hoxha dhe H. Faik Hoxha për kontributet e tyre në shërbim të Thirrjes Islame.

Ø   Me datën 11 qershor 2007, u zhvillua mbledhja e radhës me teologët dhe thirrësit islamë të qytetit, ku u diskutua rreth rolit të informacionit në ndërtimin e opinionit të përgjithshëm publik dhe angazhimit që duhet të kenë punonjësit në fushën e Thirrjes Islame në raport me të. Gjatë këtij takimi u miratua edhe platforma e re për ecurinë e emisionit të përjavshëm: “Jehona Islame” në bashkëpunim me Tv Kopliku.

Ø   Me datën 12 qershor, u zhvillua një takim me thirrëset islame dhe teologet e diplomuara në Universitetet e ndryshme të botës islame. Në këtë takim u diskutua rreth rolit pozitiv dhe domosdoshmërisë së angazhimit të grave në jetën aktive të Thirrjes Islame, sikurse u miratua edhe një platformë për zhvillimin e derseve javore për motrat besimtare në xhami të ndryshme të qytetit, si në Parrucë (thirrësja islame Ferzet Ndoja), në Fushë-Çelë (thirrësja islame Zamira Puka), Perash (teologia Aisa Kaduku), etj.

Ø    Me datën 14 qershor 2007, në ambientet e Hotel Tirana Internacional, u zhvillua sesioni shkencor ndërkombëtar: “Kurani- Mrekullia e përjetshme për Profetin Muhammed”, organizuar nga Fondacioni i Kuranit në bashkëpunim me Komunitetin Musliman Shqiptar dhe Akademinë e Shkencave. Gjatë këtij aktiviteti Imam Ndriçim Sulejmani u takua dhe zhvilloi biseda të ngrohta e miqësore me Kryetarin e BI të Maqedonisë H. Sulejman Rexhepi, me Drejtorin e Përgjithshëm të Fondacionit të Kuranit z. Hossain Assadi, me përkthyesin e parë të Kuranit në gjuhën shqipe Dr. Feti Mehdiu, etj.

Ø   Me datën 21 qershor 2007, myftiu Imam Ndriçim Sulejmani, i shoqëruar edhe nga një grup hoxhallarësh, mori pjesë në inaugurimin e xhamisë së re në Tepelenë. Sipas të dhënave zyrtare, kjo është hera e parë që në këtë qytet me një përqindje absolute islame ndërtohet një xhami në qytet. Në fjalimin e tij përshëndetës, myftiu i Shkodrës falënderoi sponsorizuesit e këtij projekti multifunksional, “Vakëfin Islam Turko-Shqiptar” për vlerat e mëdha humane, shpirtërore dhe intelektuale që i dhuruan këtij qyteti dhe besimtarëve të tij me ndërtimin e “këtij Kompleksi Islam”, siç e quajti ai xhaminë e re. Në këtë ceremoni merrte pjesë edhe Kryetari i Komunitetit Musliman Shqiptar, H. Selim Muça.

Ø   Me datën 24 qershor 2007, gjatë një vizite në Vladimir të Malit të Zi, Imam Ndriçim Sulejmani zhvilloi një takim të përzemërt e vëllazëror me munshidin e mirënjohur nga Shkupi, z.Adem Ramadani. Gjatë këtij takimi të ngrohtë, myftiu Sulejmani e ftoi munshidin, që ka fituar zemrat e dëgjuesve të shumtë edhe në Shkodër, për një aktivitet në qytetin verior, ftesë të cilën e priti me shumë përzemërsi ne nje kohe te pershtatshme.

Ø   Nga data 25 qershor- 1 korrik 2007, myftiu Imam Ndriçim Sulejmani, udhëtoi drejt Turqisë, në një aktivitet të përbashkët njëjavor, bashkëpunim mes Komunitetit Musliman Shqiptar dhe Dijanetit Turk. Gjatë këtij udhëtimi delegacioni i myftilerëve nga shqiperia u njoh nepermjet vizitave te ndryshme me qendra kulturore e historike islame,  si ne stamboll ashtu edhe ne Bursa, ku vereu nga afer gjurmë të qytetërimit të pashoq të kalifatit islam osman. Gjatë këtij udhëtimi, delegacioni shqiptar u takua edhe me Kryetarin e Konferencës Islame Ndërkombëtare, Dr. Ekmeludin Ihsanoglu, i cili kërkoi nga delegacioni shqiptar një angazhim serioz për qënien e Shqipërisë aktive në këtë Konferencë fetare islame, ku janë bashkuar zërat më emeinentë të ymmetit islam.