Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Një muaj në fokus, prill 2008

Me datën 02 prill 2008, ditën e martirizimit të katër dëshmorëve të demokracisë, myftiu i Shkodrës Imam Ndriçim Sulejmani, së bashku me një staf të përzgjedhur bënë vizita në shtëpitë e katër dëshmorëve pishtarë të demokracisë dhe të lirisë së besimit, pikërisht në familjet e Bujar Bishanakut, Arben Brocit, Nazmi Kryeziut dhe të Besnik Cekës. Myftiu u shprehu familjarëve vlerësimet më të larta në emër të Komunitetit Mysliman, duke e krahasuar figurën e veprën e tyre me atë të shehidëve. Vizita u bënë edhe në memorialin dhe varrezat e tyre, ku u bënë lutjet përkatëse që shpirtrat e tyre të prehen në xhennet.

Me datën 03 prill 2008, me ftesë të kryeimamit të Ulqinit, z. Rexhep Lika, myftiu Imam Ndriçim Sulejmani mori pjesë në një ceremoni të veçantë: atë të hedhjes së gurëthemelit të fillimit të punimeve të ripërtëritjes së Xhamisë së Detarëve, xhami shekullore dhe me tradita në Ulqin. Kjo ditë u bë më e veçantë me pjesëmarrjen e personaliteteve fetare si Reis Ulema i Malit të zi z. Rifat Fejziq, të kryemyftiut Jusuf Gjoka e të tjerë imamëllarë e hoxhallarë të zonës.  Mes tekbireve dhe lutjeve, kryetari i komunes së Ulqinit, së bashku me Reisin Rifat Fejziq hodhën simbolikisht disa lopata me beton në themelet e xhamisë së detarëve. Kjo ditë kaloi në një atmosferë festive.

Me datën 26 prill 2008, myftiu i Shkodrës Imam Ndriçim Sulejmani, nëpërmjet një mesazhi drejtuar besimtarëve ortodoksë të qytetit të Shkodrës e më gjërë, u uroi atyre festën e “Pashkëve”. Ndërsa me datën 27 u bënë vizita në kishën ortodokse, ku dhe u shkëmbyen mesazhe të drejtpërdrejta të fqinjësisë dhe të harmonisë së mirë mes komuniteteve, karakteristikë e veçante dalluese e tyre.

Pasditen e datës 27 prill 2008, në mesin e qindra besimtarëve u zhvillua ceremonia e fillimit të punimeve për ndërtimin e një kompleksi plotësues (xhami dhe konvikt) i cili do t’i japë gjallëri dhe pamje tjetër jo vetëm medresesë “Haxhi Sheh Shamia” por edhe gjithë qytetit dhe komunitetit përreth. Në këtë ceremoni merrnin pjesë autoritete fetare të shumtë që nga Greqia, Maqedonia, Kosova, Mali i zi, Ulqini, myftilerë rrethesh etj. Takimi u hap nga drejtori i medresesë, z. Kujtim Dervishi. Më pas përshëndetën kryetari i KMSH, Haxhi Selim Muça, myftiu i Shkodrës Imam Ndriçim Sulejmani, kryetari i bashkisë z. Lorenc Luka, prefekti z. Maxhid Cungu etj. Në këtë vend, simbolikisht, në shkëmbim të dhuratës së madhe që Zoti me madhërinë e tij mundësoi fillimin e punimeve, u pre një kurban në shenjë mirënjohje dhe mbarësie. Ky projekt po vihet në zbatim në sajë të bashkëpunimit të myftinisë Shkodër dhe shoqatës sponsorizuese VHK të Stambollit. Për t’u vlerësuar është dhe kontributi i mëparshëm i fondacionit “Islamic Relief” i cili në koordinimin e punëve arriti të tërheqë investitorë të Bankës Islamike të Xhidas për të sponsorizuar ndërtimin e medresesë dhe mbajtjen e saj për një periudhë të gjatë. 

"O ti Pejgamber, Ne të dërguam ty dëshmues, lajmëtar përgëzues e qortues. Dhe me urdhërin e All-llahut, thirrës për në rrugën e Tij dhe pishtarë ndriçues. E besimtarëve jepu sihariq se prej All-llahut ata kanë dhunti të madhe". 

(Ahzab: 45-47)