Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Mesazhi i parë zyrtar i Myftiut të ri të Shkodrës

Imam Ndriçim Sulejmani

Të nderuar vëllezër dhe motra muslimanë,

   Të nderuar bashkëqytetarë të mi,

   Me rastin e prezantimit tim në detyrën e Myftiut të Shkodrës, sipas dispozitave statuore të Komunitetit Musliman Shqiptar, organit më të lartë përfaqësues të muslimanëve në Shqipëri, gjej rastin të dal sot para jush me këtë mesazh, duke u lutur për mbarësinë dhe begatinë tonë të përbashkët.

   Myftinia Shkodër, drejtimi i së cilës m’u besua që nga data 16. 11. 2006, do të jetë një institucion fetar, që do të kujdeset për konsolidimin e vlerave islame në këtë vend, sikurse do të angazhohet për të ecur në gjurmët e të parëve tanë, dijetarëve të shquar të Shkodrës, të cilët me mësimet e Kur’anit dhe ato të Traditës së pastër Profetike të Muhammedit (a.s) dhe me kulturën e gjerë që i karakterizonte, u bënë pishtarë të edukimit të shëndoshë islam, me baza diturie, tolerance, dialogu e qytetarie.

   Nëpërmjet këtij mesazhi të parë zyrtar, garantoj se Myftinia e Shkodrës do të përpiqet me të gjitha forcat dhe energjitë e saj intelektuale, teologjike dhe kulturore që ka në dispozicion:

·                    Të angazhohet për konsolidimin e paraqitjes së vlerave islame në formën, në mënyrën dhe kohën e duhur, bazuar te forca e urtësisë dhe e vlerave teologjike islame, siç urdhëron edhe Kur’ani Famëlartë:

              “Fto, në rrugën e Zotit tënd me urtësi dhe këshilla të mira”.

·                    Të punojë për edukimin e brezave të rinj me dituri, kulturë dhe forcë besimi, sipas porosisë së Profetit Muhammed (a.s):

              “Kërkimi i diturisë është obligim për çdo musliman”.

·                    Të nxisë kulturën e bashkëjetesës ndërfetare dhe ta mbrojë atë, i     paraprirë nga ajeti kur’anor:

            ”Me ithtarët e librit mos polemizo veçse me atë mënyrën më të mirë”.

·                    Të shtrijë dorën e bashkëpunimit para të gjitha iniciativave qytetëruese, që kanë për qëllim rritjen e nivelit besimor, moral, human dhe bamirës në shërbim të njeriut, cilitdo njeri, sipas porosisë profetike:

  “Nuk beson askush prej jush derisa të dojë për vëllanë e tij njeri, atë që do edhe për veten e tij”.  

   Në fund, i lutem All-llahut të Madhëruar, të na dhurojë mbarësi dhe përkujdesje hyjnore në këtë detyrë fisnike dhe plot përgjegjësi, si dhe t’i dhurojë popullit shqiptar mëshirë, dashuri, mirëqenie dhe besim.

   Ju faleminderit!

Shkodër, më 29. 11. 2006