Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

بسم الله الرحمن الرحيم

Mesazhi i myftiut të Shkodrës, Imam Ndriçim Sulejmani

me rastin e 7 dhe 8 marsit

Shkodër, më 7 mars 2007

   Të nderuar arsimtarë, të dashur mësues, të shtrenjta nëna,

   Nderimi dhe respekti për figurën tuaj dhe mesazhet e diturisë, mëshirës, dashurisë, udhëzimit dhe edukimit të brezave, që ju jepni çdo ditë, buron nga Kur’ani Famëlartë, i cili, që në momentet  e para të zbritjes së tij, udhëzoi drejt diturisë dhe kërkimit të saj. Por, si dituria ashtu edhe edukimi, nuk mund të merren pa ndërmjetësinë e mësuesve, pa bekimet e nënave, pa insistimin e edukatorëve të devotshëm e të përkushtuar ndaj brezave dhe rritjes së tyre.

   Ne, si myslimanë, e kemi për obligim fetar bindjen dhe dashurinë ndaj prindërve, pasi Kur’ani Famëlartë udhëzon respektin e tyre pas adhurimit të Zotit, sikurse jemi të udhëzuar drejt respektit dhe nderimit të mësuesve, njerëzve të ditur, për të cilët Profeti Muhammed (a.s) thoshte, se: “Dijetarët janë trashëgimtarë të Profetëve”.

   Prandaj, me rastin e këtyre dy ditëve, qe janë bërë si traditë nderimi dhe respektimi ndaj mësuesit dhe prindit, më lejoni që në emrin tim personal dhe të institucionit që përfaqësoj, t’ju uroj çdo të mirë e begati në jetën tuaj.

   Gjithashtu, i ftoj të gjithë mësuesit dhe prindërit në veçanti, të jenë të kujdesshëm me fëmijët dhe rininë tonë, sidomos në këto ditë, kur ata përballen me sfidat e reja të këtij mijëvjeçari.

   Fëmijët tanë, rinia dhe e gjithë shoqëria jonë, kanë nevojë për besim në Zotin, për mesazhet hyjnore që burojnë nga Librat Qiellorë, për moralin e fesë e mbi të gjitha për përkushtimin ndaj besimit. Prandaj, në këto ditë, roli i mësuesit dhe i prindit bëhet edhe më vendimtar në drejtimin e shoqërisë drejt vlerave të besimit dhe fesë.

   Njëkohësisht, i bëj thirrje të gjithë nxënësve të dijes, të respektojnë e të nderojnë mësuesit e tyre, sepse respekti ndaj tyre është tregues i besimit dhe i reflektimit qytetar.

   Në fund të këtij mesazhi, i lutem All-llahut të madhëruar, t’i dhurojë mbarësi e begati, të gjithë mësuesve të përkushtuar, nënave të shtrenjta, prindërve.

Myftiu i Shkodrës

Imam Ndriçim Sulejmani