Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Me ftesë nga myftiu i Shkodrës, Imam Ndriçim Sulejmani mbërriti në Shkodër për një vizitë kortezie Ambasadori i Mbretërisë së Arabisë Saudite, Hirësia e tij z. Abdullah Ibn Sulejman Al Hamdan. Ambasadori u prit fillimisht në zyrat e myftinisë nga stafi i myftinisë. Në këtë takim ambasadori El Hamdan shprehu kënaqësinë e tij që ndodhej në Shkodër. Më pas myftiu pasi uroi mirëseardhjen shprehu konsideratat më të larta për vizitën e ambasadorit. Ai vlerësoi kontributin e çmuar që kanë dhënë vendet arabe në ringritjen e objekteve të kultit pas periudhës së komunizmit, gjithashtu dhe kontributet e çmuara dhënë gjatë periudhave të vështira të tranzicionit gjatë viteve 97-98

Në zyrën e myftinisë Shkodër u zhvillua një takim pune me përfaqësuesit e myftinive të cilat operojnë në qarkun e Shkodrës, pikërisht me myftinitë e Tropojës, Pukës, Hasit, Koplikut etj. Në këtë mbledhje, myftiu Sulejmani foli për bashkërenditjen e programeve të këtyre myftinive me atë të qendrës, konform statutit të KMSH-së dhe ligjeve në fuqi të shtetit. Gjithashtu u trajtuan dhe proceset e ndihmesës juridike në çështjet e pronave nga ana e myftinisë së Shkodrës.

Myftiu Imam Ndriçim Sulejmani përcolli për mediat një mesazh me rastin e festave tradicionale të 7-8 Marsit. Në këtë mesazh, krahas urimit myftiu bëri dhe një apel drejtuar organeve arsimore për rastin e pakëndshëm të përjashtimit nga shkolla të dy motrave myslimane në një nga shkollat e kryeqytetit, për rikthimin e tyre në shkollë.

Në myftininë e Shkodrës mbërriti një delegacion nga Dijaneti Turk i kryesuar nga kryetari i Komunitetit Mysliman të Turqisë, z. Ali Bardokoglu. Z. Bardokoglu vinte në Shkodër pas një vizite të krerëve myslimanë të shteteve ballkanike në Podgoricë të Malit të zi.

Me rastin e përkujtimit të lindjes së profetit të dashur, Muhamed a.s myftinia e Shkodrës organizoi një takim me motra dhe vëllezër besimtarë në xhaminë e madhe “Ebu Beker”. Në këtë aktivitet merrnin pjesë myftiu, Imam Ndriçim Sulejmani, teologu A. Halluni, H. Faik Hoxha, Hfz. Shukri Kapllan e grupi i mevludit i burrave dhe i medresesë së vajzave "Haxhi Sheh Shamia". Ky ishte aktiviteti i parë që çel muajin rebiul evel dhe do të pasohet e pasurohet me aktivitete të tjera në ditët në vijim.

Myftinia e Shkodrës, nëpërmjet një mesazhi u përcolli besimtarëve të krishterë dhe drejtuesve të tyre urimet për festën e Pashkëve. Mes të tjerave përshëndeti familjet e krishtera duke u lutur për lumturi, paqe shpirtërore dhe besim tek i Madhi Zot.

Në vazhdën e bashkëpunimit dhe zbatimit të planit vjetor 2008, mbi zbatimin e disa projekteve të rëndësishme, myftiu, Imam Ndriçim Sulejmani, së bashku me drejtorin e agjencisë TIKA, z. Murat Akarsu firmosën fillimin e punimeve të rrethimit dhe sistemimit të varrezave “Komane”, projekt ky i cili ka për qëllim rikthimin në identitet të vlerave kulturore qytetare dhe fetare të qytetit.

Në kuadrin e aktiviteteve për muajin rebiul evel, përkujtimit të figurës dhe veprës së profetit Muhamed a.s, myftinia e Shkodrës, në bashkëpunim me Tarikatin Rufai dhe Mesxhidin e Ehli Bejtit organizuan një simpozium të përbashkët me temë: “Muhamedi a.s, simbol i unitetit”. Në këtë takim merrnin pjesë autoritete të ndryshme fetare, vendore, intelektualë e besimtarë. Në fund të simpoziumit u prezantua një ekspozitë me gjurmët islame të cilat i mbijetuan kohës së komunizmit, të ruajtura me kujdes nga Sheh Qemaludin Reka.

Myftinia Shkodër uron të gjithë besimtarët për ditëlindjen e bekuar të Muhamedit (a.s)

Muhammedi nuk ka qenë babai i asnjërit prej burrave tuaj por ai ishte i dërguari i All-llahut dhe vulë e të gjithë pejgamberëve, e All-llahu është i dijshëm për çdo send. (Ahzab:40)

"O ti Pejgamber, Ne të dërguam ty dëshmues, lajmëtar përgëzues e qortues. Dhe me urdhërin e All-llahut, thirrës për në rrugën e Tij dhe pishtarë ndriçues. E besimtarëve jepu sihariq se prej All-llahut ata kanë dhunti të madhe". 

(Ahzab: 45-47)