Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Një muaj në fokus- maj, 2007

Ø   Pasditen e ditës së hëne, më 07. 05. 2007, myftiu i Shkodrës Imam Ndriçim Sulejmani udhëtoi drejt zonës së Postribës, për të parë nga afër ecurinë e ndërtimit të xhamisë së re të Milanit, në zonën e Domnit. Në vizitën e tij, myftiu u interesua për punimet e deritanishme në këtë xhami të re, kontribut vullnetar i bamirësit Sait Milani. Myftiu vlerësoi punën mjeshtrore të bërë deri tani në plotësimin e imazhit të kësaj xhamie të re.

Ø   Me datën 10. 05. 2007, filloi pastrimi dhe rrethimi i pronës vakëf në Zdralej që do të shfrytëzohet nga vetë myftinia, Shkodër, për nevojat e saj dhe të besimtarëve muslimanë të rrethit. I pyetur rreth fillimit të këtyre punimeve, Imam Ndriçim Sulejmani tha se ato bëhen në vazhdën e premtimeve të tij për shfrytëzimin sa më efikas të pronave të myftinisë Shkodër. Ai theksoi gjithashtu se institucioni i muslimanëve të Shkodrës, të cilin e drejton që nga nëntori i vitit të kaluar, do të ndjekë me shumë seriozitet dhe në rrugë ligjore çdo pëllëmbë prej pronave të muslimanëve, për t’i shfrytëzuar në të mirën e këtij Komuniteti. “Myftinia e Shkodrës nuk do të tolerojë asnjë përpjekje për tjetërsimin dhe përfitimin jobindës me pronat e saj. Vitet e kaluara të neglizhencës me këto prona, duhet të mbeten në sirtarët e së kaluarës, sado e afërt të jetë ajo. Myftinia e Shkodrës po ecën me hapa të matur e të kujdesshëm në këtë drejtim”- tha myftiu në një prononcim mediatik, menjëherë pas fillimit të këtyre punimeve.

   Pastrimi i pronës vakëf në Zdralej u bë me kontributin bamirës të biznesmenit, z. Flamur Hoxha.

Ø   Nga datat 12-13. 05. 2007, me ftesë nga Kryetari i Bashkësisë Islame të Maqedonisë, H. Sulejman ef. Rexhepi, myftiu i Shkodrës Imam Ndriçim Sulejmani, i shoqëruar nga imamët Ylli Buraniqi, Alban Kali dhe Ilir Dizdari, mori pjesë në përurimin e xhamisë madhështore të Kadrit në Gostivar. Gjatë vizitës në Maqedoni myftiu i Shkodrës zhvilloi një sërë takimesh me drejtues të lartë të institucioneve fetare islame shqiptare në Republikën e Maqedonisë.

Ø   Me datën 22. 05. 2007, myftiu i Shkodrës i shoqëruar nga disa pjesëtarë të stafit të tij, ka bërë një inspektim vëzhgimor në disa prej xhamive të zonës së Anës së Malit, si në Alimetaj, Velinaj, Babot-Vidhgar, Shtuf, Muriqan e Oblikë, ku ka vëzhguar prej afër gjendjen e këtyre objekteve fetare dhe të pronave vakëf në posedim të tyre. Myftiu me bashkëpunëtorët e tij kanë falur edhe mesditën në xhaminë e  Babot-Vidhgarit, e cila shërben edhe si klasë për arsimimin e fëmijëve të asaj zone.

Ø   Me datën 24. 05. 2007, u zhvillua mbledhja e radhës me Imamët e xhamive të fshatit. Në këtë mbledhje u diskutua rreth angazhimeve dhe detyrave për tremujorin e ardhshëm dhe shfytëzimin e duhur të sezonit veror për zhvillimin e kurseve dhe aktiviteteve të ndryshme me rininë dhe xhematet në përgjithësi. Të pranishmit dëgjuan me vëmendje edhe këshillat e urta të imamit të xhamisë së fshatit Oblikë, H. Musa Hoxha (trashëgues i drejtpërdrejtë i hoxhallarëve të vjetër të Shkodrës), lidhur me respektin dhe nderimin që duhet të kenë muslimanët për hoxhën dhe prijësin e tyre, si dhe angazhimin për t’u distancuar nga arroganca në marrëdhënie me prijësit e fesë.

Ø   Me datën 27. 05. 2007, u zhvillua mbledhja e radhës me teologët dhe thirrësit islamë të rrethit Shkodër. Në këtë takim u diskutua rreth projektit më të ri të myftinisë për shfrytëzimin e medias së shkruar dhe asaj vizive për prezantimin sa më dinjitoz të mendimit të pastër islam dhe udhëzimeve qytetëruese me të cilat u dërgua Vula e të Dërguarve, Muhammedi (a.s). Ky projekt do tё vihet nё jetё nё funksion tё gjallërimit tё jetёs fetare nё vend. Teologët mirëpritën iniciativën e myftinisë, Shkodër, për prezantimin e secilit prej tyre me një hytbe xhumaje, nga minberi i xhamisë së Parrucës, duke filluar nga xhumaja e ardhshme, më 01. 06. 2007.

Ø   Me 28. 05. 2007, myftiu i Shkodrёs, nё prezencën e stafit tё kësaj myftinie, i dorëzoi njё “Çertifikatё Mirёnjohjeje”, biznesmenit shkodran, z. Flamur Hoxha, pёr kontributin e vyer nё shërbim tё pastrimit tё territorit tё pronës vakëf nё Zdralej. Nё fjalёn e tij tё rastit, myftiu Sulejmani vlerësoi angazhimin qytetar e human tё biznesmenëve bamirës, qё me veprat e tyre nё shërbim tё komunitetit, dёshmojnё qartë shpirtin e madh humanist tё myslimanit tё përkushtuar ndaj fesё sё tij, nё shoqёri.