Në xhaminë e Parrucës, përkujtohet me madhështi Mevludi Sherifë

                                                                          Ditën e enjte, më 12. 04. 2007, në orën 16. 30, ishte lajmëruar fillimi i ceremonisë së Mevludit Sherifë, në përkujtim të personalitetit të Profetit Muhammed (a.s). E veçanta e kësaj ceremonie ishte mënyra e spikatur e organizimit dhe pjesëmarrja e dhjetra prijësve fetarë që shërbejnë në xhamitë e ndryshme të Shkodrës. Atmosfera e fillimit të këtij aktiviteti ishte e mbushur me emocion. Fakti i xhamisë së re... Mevludi Sherifë... Personaliteti i Profetit Muhammed (a.s) dhe dashuria e të gjithëve për të... Qarkullimi i fjalëve ndër besimtarë për pjesëmarrjen e dhjetra hoxhallarëve... Arsyet mund të ishin edhe më shumë.

   Çallmat e bardha mbi kokat e imamëve, teologëve, vaizëve dhe hoxhallarëve të moshuar e zbukuronin mjedisin dhe i jepnin atij një pamje që kishte kohë që nuk ishte përsëritur në këtë vend... ndoshta që nga koha e hoxhallarëve të shkuar të Shkodrës...

   Në të djathtën e myftiut, Imam Ndriçim Sulejmani, ishin rreshtuar thirrësi islam Muhamed Sytari (vaiz-hatib i xhamisë së Tophanës), teologu Arben Halluni, Hafiz Shukri Kapllan (drejtor i medresesë së Bushatit), Ilir Dizdari (imam i xhamisë së Tophanës) dhe thirrësi islam Altin Nikshiqi (imam-hatib i xhamisë së Mes Myselimit). Nga e majta e myftiut qëndronte H. Faik Hoxha (ish-myfti i Shkodrës), teologu Bashkim Bajraktari (imam-hatib i xhamisë së Tepes), H. Musa Hoxha dhe H. Ali Hysi, (prej hoxhallarëve të moshuar, trashëgues të hoxhallarëve të

shkuar të Shkodrës), H. Fejzi Zaganjori (imam-hatib i xhamisë së Rusit) dhe H. Faik Zaganjori (drejtues i grupit të mevludit).

   Më pas vinte grupi i mevludit, që përbëhej nga teologu Alban Kali (imam i xhamisë së Parrucës), H. Faik Zaganjori, z. Sami Muçej dhe medresisti Suad Dushi.

   Ceremonia filloi me disa ajete kur’anore të lexuara nga imami i xhamisë së Parrucës. Përshëndeti myftiu i Shkodrës, i cili shpalosi angazhimin e myftinisë për ta përcjellur lajmin e gëzimit të lindjes së Hz. Muhammedit (a.s) te besimtarët. Ai njëkohësisht këshilloi të pranishmit që të mësojnë fëmijët dhe të rinjtë me dashurinë për Profetin e tyre. Ilahitë e bukura dhe pjesët e mevludit të kënduara me ëmbëlsi nga grupi i mevludit, ndezën emocionet e besimtarëve të shumtë që kishin ardhur për të marrë kënaqësinë dhe begatinë e tubimit të mëshirës. Ligjërata e këtij aktiviteti u mbajt nga thirrësi islam Muhamed Sytari, i cili foli mbi dashurinë për Resulull-llahin (a.s)  

dhe mbi vlerën e salavatit mbi të dërguarin e All-llahut.

   Ceremonia u mbyll me dua-hatmen e Kur’anit, që u bë nga H. Faik Hoxha.

   Përshëndetjet e ngrohta të besimtarëve me prijësit e tyre fetarë ishin kurora e mbylljes së këtij aktiviteti madhështor, në përkujtim të Profetit Muhammed (a.s) dhe mesazheve udhëzuese me të cilat u dërgua, mëshirë për të gjithë botrat.