Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Votohet Këshilli i ri i Myftinisë Shkodër

Shkodër, më 25 gusht 2007

   Ditën e shtunë, më 25 gusht 2007, në ambientet e medresesë “Haxhi Sheh Shamia”, dega e djemve, u zhvillua procesi i votimit për zgjedhjen e Këshillit të ri të Myftinisë Shkodër. Në këtë votim, ku morën pjesë imamë, muezinë dhe aktivistë të ndryshëm të xhamiave të qytetit dhe të fshatit, u përzgjodh me shumicë dominuese votash paketa e propozuar nga Myftiu i Shkodrës Imam Ndriçim Sulejmani, me listën prej 15 antarësh, kandidatë për Këshillin e ri të kësaj Myftinie.

   Para fillimit të procesit të votimit, pjesëmarrësit patën rast të dëgjonin një bisedë këshilluese nga Hafiz Musa Hoxha, trashëgimtar i hoxhallarëve të vjetër të Shkodrës, si: H. Muhamed Bekteshi, H. Esat Myftia, H. Sabri Bushati, prej të cilëve ka marrë mësime dhe dituri në rininë e tij.

   Më pas, procesi i përzgjedhjes së Këshillit të ri të Myftinisë Shkodër, ka filluar me këndimin e disa ajeteve kuranore, me zërin e Hafiz Shukri Kapllan, drejtor i medresesë së Bushatit.

   Në këtë proces votimi merrte pjesë edhe Kryetari i Komunitetit Musliman Shqiptar, Hirësia e Tij Haxhi Selim Muça, shoqëruar nga Kryetari i Këshillit të Përgjithshëm të K. M. Shqiptar, H. Ahmet Çaushi dhe drejtori i zyrës së burimeve njerëzore pranë K. M. Sh, z. Genti Kruja.

   Votimi u karakterizua nga një frymë besimtare dhe qytetëruese, ku nuk munguan edhe ndërhyrjet dhe pyetjet sqaruese nga votuesit, që ia plotësuan këtij votimi imazhin e një tubimi të begatë besimtarësh muslimanë.

   Në prezantimin e paketës së propozuar nga Myftiu Imam Ndriçim Sulejmani, u bë një prezantim i shkurtër për secilin nga kandidatët e kësaj pakete, që u cilësuan si: “përfaqësues të xhamiave të qytetit dhe të fshatit, të shkollave të ndryshme teologjike, të pjesës intelektuale shkodrane dhe biznesmenëve muslimanë të qytetit”.

   Në përfundim të votimit dhe pas daljes së emrave fitues në të, u formua Këshilli i ri i Myftinisë Shkodër, me këtë përbërje:

1. Imam Ndriçim Sulejmani, myftiu i Shkodrës,

2. Blendi Alushi, administrator  i Myftinisë,

3. Muhamed Sytari, hatib i xhamisë Tophanë,

4. Lavdi Hamja, vaiz  shëtitës,

5. Fejzi Zaganjori, imam i xhamisë Rus,

6. Arben Halluni, inspektor i kurseve të myftinisë Shkodër,

7. Ylli Buraniqi, imam i xhamisë “Ebu Bekër”

8. Kujtim Dervishi, drejtor i medresesë “Haxhi Sheh Shamia”

9. Artur Tagani, master i shkencave teologjike,

10. Gëzim Uruçi, profesor honoris i shkencave gjeografike dhe euroetnologjike,

11. Eljaz Kraja, studiues i gjuhës shqipe,

12. Besnik Saraçi, biznesmen,

13. Dritan Rrahmani, imam i xhamisë Kiras,

14. Mit’hat Myftia, imam i xhamisë së Plumbit,

15. Pëllumb Sallku, aktivist i hapjes së xhamisë së Plumbit.

   Njëkohësisht, anëtarët e Këshillit të ri të Myftinisë Shkodër, në mbledhjen e tyre të parë pas përzgjedhjes në këtë detyrë fisnike, votuan për zgjedhjen e dy kandidaturave, që do të përfaqësojnë Myftininë e Shkodrës në Këshillin e Përgjithshëm të Komunitetit Musliman Shqiptar. Në përfundim të votimit, Këshilli i ri i Myftinisë Shkodër, zgjodhi thirrësin islam Muhamed Sytari dhe imamin e xhamisë Rus, H. Fejzi Zaganjori, si anëtarë të ri të Këshillit të Përgjithshëm të K. M. Sh.

Lavdi Hamja