Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

Qendra Ndërfetare e Grave, Shkodër organizon seminarin me temë:

 “Dialogu dhe harmonia ndërfetare, për një të ardhme në paqe e barazi”

Myftiu, Imam Ndriçim Sulejmani: “Propozoj që sheshit ku janë vendosur xhamia “Ebu Bekr”, kisha françeskane dhe kisha orthodhokse, t’i vihet emri “Hafiz Jusuf Karakaçi”, si simbol i shtrenjtë i nxitjes dhe i forcimit të mesazheve të bashkëjetesës ndërfetare në qytetin tonë”

   Me datën 10. 02. 2007, ditën e shtunë, në sallën e konferencave të Hotel “Europa”, u zhvillua seminari: “Dialogu dhe harmonia ndërfetare, për një të ardhme në paqe e barazi”, organizuar nga Qendra Ndërfetare e Grave, Shkodër, me mbështetjen e disa organizmave ndërkombëtare, që operojnë në vendin tonë.

   Në këtë aktivitet merrnin pjesë përfaqësues të qeverisjes lokale vendore, kryetari i komitetit shtetëror të kulteve, rektori i universitetit “Luigj Gurakuqi”, studiues të ndryshëm, intelektualë, përfaqësues fetarë, etj.

   Aktiviteti u përshëndet nga krerët e tri institucioneve fetare në qytetin tonë, Imam Ndriçim Sulejmani, Mons. Angelo Massafra dhe At Nikolla Petani.

   Në ligjëratën e tij, të titulluar: ”Muslimanët shkodranë mbrojtës të denjë të bashkëjetesës ndërfetare, përçues të mësimeve kur’anore dhe të qytetërimit islam”, myftiu Ndriçim Sulejmani u ndal te argumentet e shumta kur’anore dhe profetike, që nxisin harmoninë ndërfetare dhe u përqendrua edhe te roli i muslimanëve në bashkëjetesën me tjetrin. Ai përmendi fakte të shumta nga faqet e historisë mbi realitetin e kësaj bashkëjetese te baballarët dhe brezat e kaluar, duke tërhequr vëmendjen e të pranishëmve se: “Ne, si muslimanë, kemi qenë dhe do të vazhdojmë të jemi një faktor prezent dhe i rëndësishëm në edukimin e brezave të ri shqiptarë me edukatën e bashkëjetesës harmonike, që respekton kufijtë e tjetrit dhe punon me qëllim të pastër për sigurinë dhe harmoninë kombëtare, e cila i ka rrënjët në Kur’anin Famëlartë dhe në Traditën e Profetit Muhammed (a.s).”

   Ai gjithashtu vuri theksin te domosdoshmëria e forcimit të traditës së bashkëjetesës në Shkodër, duke iu referuar burimeve hyjnore dhe trashëgimisë kombëtare.

   “Për Hafiz Jusuf Karakaçin shkruhet se ai ishte "i bindur se dashuria mes njerëzve ndërtonte një jetë të qetë e të mirë, ndaj dhe predikonte vëllazërimin, bashkimin e harmoninë në mes të njerëzve të tre besimeve, duke iu kundërvënë gojëve të liga e përçarësve. Më në pah një obligim të tillë e nxirrte fakti se në lagjen ku ai jetonte e shërbente, banonin familje të të tre besimeve. Ai ishte ideatori që rrugës së Çakajve-Karakaçi, t'i vihej emri "Bashkimi", propozim që u miratua nga organet e pushtetit vendor…"[1]

   Edhe unë, nga ky podium, duke marrë shkas nga ky propozim i Hafiz Jusuf Karakaçit, i propozoj pushtetarëve të pranishëm me ne, që sheshit ku janë vendosur xhamia “Ebu Bekr”, kisha françeskane dhe kisha orthodhokse, t’i vihet emri “Sheshi Hafiz Jusuf Karakaçi”, si simbol i shtrenjtë i nxitjes dhe i forcimit të mesazheve të bashkëjetesës ndërfetare në qytetin tonë.”- tha ndër të tjera myftiu Sulejmani.

   Ligjërata e tij përfundoi me këto fjalë: ”Ne, si muslimanë, jemi të angazhuar që dita-ditës të thellojmë rininë tonë në kuptimin e duhur të koncepteve islame mbi jetën, në mënyrë që të jetojnë në harmoni të plotë me Zotin, me veten dhe me tjetrin.

   Begatitë hyjnore qofshin mbi të gjithë ata që punojnë me sinqeritet për të përçuar mesazhet e dritës së pastër të besimit në Njësinë e Zotit dhe mesazheve të harmonisë ndërnjerëzore, që burojnë nga besimi në Krijuesin Fuqiplotë.”

   Në këtë seminar përshëndetën edhe Mons. Angelo Massafra, At Nikolla Petani, prefekti i Shkodrës, z. Maxhid Cungu, kryetari i komitetit shtetëror të kulteve, z. Rasim Hasanaj, etj., sikurse referuan edhe H. Fejzi Zaganjori, z. Luigj Mila dhe znj. Fatbardha Hoxha.

   Pas përfundimit të këtij aktiviteti, myftiu i Shkodrës, Imam Ndriçim Sulejmani dha një intervistë për gazetën amerikane “The Washington Post”, ku gazetarja Mary Jordan, e pyeti në lidhje me situatën ndërfetare në Shkodër dhe kontributin e myftinisë që ai drejton në ruajtjen dhe kultivimin e harmonisë në qytetion tonë.

Lavdrim Hamja

Shkodër, më 10. 03. 2007