Dhe thuaj: "Veproni, All-llahu do ta shohë veprën tuaj, edhe i dërguari i Tij e besimtarët, e më vonë do të ktheheni te njohësi i të fshehtës dhe të dukshmes, e do t'ju njoftojë për atë që vepruat.

“Turpi është degë prej degëve të besimit”

(Rezume e hytbes së mbajtur nga Myftiu i Shkodrës,

Imam Ndriçim Sulejmani,

në xhaminë “Ebu Bekr”, ditën e xhuma, më 08. 12. 2006 )

   Të nderuar besimtarë,

   Është transmetuar se “Çdo fe e ka një moral dhe morali i Islamit është turpi”, sikurse është transmetuar nga Ebu Mes’ud el-Ensariu (r.a), se i dërguari i All-llahut (s.a.v.s) ka thënë: “Ajo çfarë kanë mësuar njerëzit nga profetësitë e hershme është: Kur nuk ke turp vepro ç’të duash”

   Vëllezër dhe motra,

   Ajo çfarë duhet të interesohemi për të edukuar brezat e rinj të kësaj kohe është edhe ndjesia e turpit, si një pjesë e rëndësishme e moralit islam, i cili buron nga pastërtia e mësimeve kur’anore dhe e traditës profetike.

   Është transmetuar në librin e saktë të Imam Bukhariut dhe në atë të Imam Muslimit, se i dërguari i All-llahut, ka thënë: “Turpi është degë prej degëve të besimit”, si dhe ka vërtetuar para gjithësisë se “Turpi sjell vetëm të mira”, fakte që na nxisin të jemi të vëmendshëm dhe të kujdesshëm në marrëdhëniet tona me njëri-tjetrin e me shoqërinë.

   Muslimani nuk duhet të jetë njeri arrogant, i pasjellshëm, mosrespektues ndaj më të mëdhenjve e mosmëshirues ndaj më të vegjëlve. “Ai që nuk njeh vendin e të madhit tonë dhe nuk mëshiron të voglin tonë, nuk është prej nesh”, transmetohet në librat e traditës së pastër islame.

   Muslimanët e kësaj kohe duhet të angazhohen maksimalisht me dituri e devotshmëri, e të largohen nga bota e pështirë e thashethemeve dhe paragjykimeve, sepse ato e dëmtojnë unitetin islam dhe reflektojnë mungesë turpi dhe fisnikërie njerëzore.

   Duhet të kemi kujdes me sjelljet tona, mos të fyejmë njeri, mos të flasim prapa shpine për njeri, mos të nxisim fitnet në mes të muslimanëve dhe të ruhemi nga duar të jashtme që mundohen të përçajnë e të prishin harmoninë islame në mes vëllezërve të një feje e një besimi.

   Vëllezër dhe motra,

   Sot, është shumë e rëndësishme për ne që të jemi njerëz të fortë me besimin tonë, të aftë për të kuptuar realitetin në të cilin jetojmë dhe të punojmë me të gjitha mundësitë tona që mësimet e pastra besimore, me të cilat jemi veshur, të arrijnë në vendin e duhur, që kjo shoqëri, pjesë e së cilës jemi të gjithë, të kthehet nga burimi i mirësisë dhe i mbarësisë, të veshet me besimin e Njësisë, të zbukurohet me moralin e turpit, të fuqizohet me dituri e urtësi e të jetë shembull në familjen e madhe të shoqërive njerëzore.

  All-llahut të Madhëruar i lutemi të na mbrojë nga e keqja dhe njerëzit e saj dhe të na dhurojë mbarësi në besim. Amin!

Shkodër, më 08. 12. 2006