Mesazh urimi me rastin e Kurban Bajramit 20 dhjetor 2007

 

Falënderimet i takojnë Allahut të Madhëruar, i Cili na mundësoi t'i arrijmë këto ditë dhe netë të begata të dhul-hixhes, ditë në të cilat haxhilerët anekënd botës mblidhen në tubimin më madhështor njerëzor pranë Qabesë së madhërueshme, për të kryer e çuar në vend një ndër detyrat më kryesore të Islamit, siç është edhe kryerja e haxhit. 

Të nderuar besimtarë myslimanë!

Kurban Bajrami është një ditë e madhëruar për myslimanët, sepse pikërisht në këtë ditë përkujtohet edhe nënshtrimi absolut i babait të profetëve, Ibrahimit a.s, i cili me bindje të plotë u tregua i gatshëm të flijonte edhe më të shtrenjtën e tij, djalin Ismail a.s në shenjë bindjeje ndaj Fuqiplotit, për të treguar se Zoti për të ishte gjithçka në jetë dhe përkushtimi ndaj urdhëresave të Tij ishte më i larti.

Kurban Bajrami është dita në të cilën besimtari mysliman tregon vlerat e tij më të mira duke dhënë ndihmesë sociale ndaj të varfërve dhe duke iniciuar shpirtin human të çdo njeriu për të kontribuar dhe për t'u solidarizuar me vuajtjet e të tjerëve. Shpërndarja e kurbaneve ndër të varfër nuk është gjë tjetër veçse një shembull modest e konkret për t’u pasuar nga të tjerë.

Nëpërmjet kësaj vepre myslimani shpreson të arrijë kënaqësinë e Allahut dhe afrimin tek   Ai.

I lutem Allahut të Madhëruar  që kjo ditë të afrojë zemrat e njerëzve me njeri tjetrin. Në mënyrë të veçantë Kurban Bajramin jua urojmë të gjithë mërgimtarëve të shpërndarë anekënd botës, të sëmurëve që të kenë shërim të shpejtë, jetimëve dhe të gjithë njerëzve që për arsye gjakmarrjeje dhe hakmarrjeje janë të ngujuar,

                                                       

                                                  Për shumë vjet Kurban Bajramin!  

Myftiu i Shkodrës

Imam Ndriçim Sulejmani